Экскурсія ў музей Я. Коласа ў в. Пінкавічы
11.11.20195 лістапада вучні пачатковых класаў наведалі літаратурна-этнаграфічны музей Я. Коласа ў в. Пінкавічы. Ён размешчаны ў абноўленым будынку школы, дзе ў 1904 – 1906 гадах працаваў настаўнікам народны паэт Беларусі Я. Колас.
Гэты сапраўды цудоўны кавалачак гісторыі ў цэнтры Палесся ахутаў вучняў духам беларускага сялянскага побыту, даў магчымасць дакрануцца да гісторыі жыцця найвялікшага беларускага пісьменніка.
У першай экспазіцыйнай зале, “Сялянскім доміку”, які размешчаны на тым месцы, дзе была кватэра Я. Коласа, дзеці не толькі змаглі ўзяць у рукі прадметы таго часу, убачыць рэчы, якімі карыстаўся паэт, але і з дапамогай Ж. М. Верыч разыгралі дыялог маладога настаўніка, які хадзіў па сялянскіх хатах в. Пінкавічы і спрабаваў угаварыць гаспадынь аддаваць у школу сялянскіх дзяўчынак. Тым самым пачаткоўцы змаглі адчуць сябе ў пачатку ХХ стагоддзя.
У 2 і 3 залах дзеці разгледзелі рарытэтныя фотаздымкі, арыгінальныя дакументы, кнігі Я. Коласа і беларускіх пісьменнікаў, выдадзеныя шмат гадоў таму, адзенне, абутак, нумізматыку таго часу.
Таксама дзеці пазнаёміліся з экспазіцыяй з Музея Беларускага Палесся, якая складзена з унікальных экспанатаў, звязаных з асобай Я. Коласа. Яны раскрываюць нам яго дабрыню, чуласць і спагадлівасць.